發信人: iug@ccms.ntu (Iunn Ungian), 信區: Taiwanese
標 題: 我Loonng兮一時有主意 (TGHS C01)
發信站: 台灣大學 (Tue Nov 8 10:50:37 1994)
轉信站: cis_nctu!news.cis.nctu!news.cc.nctu!nctuccca!netnews.ntu!ccms!iug
我Loonng兮一時有主意
---寫ti 91 年選舉後
滷卵
選舉了後，彼支車輪牌兮旗仔猶原ti職塊土地
射出邪惡兮光芒。一時，茫茫渺渺毋知卜創啥
。
我Loonng兮一時有主意，滄滄行又閣滄滄去。
抵著一兮歷史專家。荷蘭，西班牙，國姓爺，
滿清，日據到國據。著愛閣換幾兮主人才輪會
著咱家己。
我著問伊歷史敢會使予人改來閣改去? 伊講：
「控制了現在著控制了過去。」我問伊獨裁政
權敢有影hiah厲害? 伊講歷史本來著是一寡記
錄予人改來閣改去。
我Loonng兮一時煞有主意，想起阮公阿卜死閣
有交代，伊講尹公阿卜死嘛有交代。
伊講滿清扑輸來換日本。逐家 iammi 仔攏毋
甘鉸。大人壓霸來迫害。鉸了挓佫神主牌仔前
來拜毋是背祖求榮鉸 iammi，甘願受外族來統
治。拜甲腳手躄躄泄。公媽煞摔落桌跤弄弄破
。香灰來即看著公媽有交代：「滿清外族無天
理，thai咱歸族數千人。千辛萬苦來台灣，囝孫
毋通留iammi。」
（iammi 著是 『辮子』）
阮阿公兮阿公煞毋知愛留益是毋通留iammi。
我著ka阮阿公講:
政府按怎講咱著按怎信，
Chhap 伊卜留益毋留iammi。
阮公罵我戇孫兮，
做儂愛拚一口氣。
阮公仔卜死有交代，
做儂愛拚一口氣。
如今過了即儕冬，
即知影政府會騙儂。
阮孫若問我尹祖先敢是1949綴迄隻臭頭龜精來
兮，我只好將阮阿公兮阿公兮故事講予伊聽。
一時怨嘆咱番藷仔命。
茫茫渺渺煞毋知卜創啥。
我Loonng兮一時有主意，
chhiang chhiang行又閣chhiang chhiang去。
抵著一兮正義兮勇士。
我著共伊問，
「咱兮歷史即歹命，
敢講咱無愛佮伊拚。」
伊聽了煞無講話。
夯起七星寶劍chhiang去頭前佮oebi 兮水車戰
佮chhin chhong chhaN。等伊扑輸倒佇遐，我
即問伊是按怎，為何干那起乩塊戰水車。
伊講彼毋是水車，伊是向邪惡兮化身來挑戰。
咱敢戰會嬴箍面桶兮戰車?
戰嬴箍面桶兮戰車敢閣戰會嬴紅星兮戰車?
我一時感覺茫茫渺渺毋知卜創啥。
我Loonng哥仔lo,
一時有主意。
請教迄lo 選舉專家。
我問伊咱卜按怎嬴?
伊講咱選舉著會嬴，
「三年執政」
「台灣儂卜出頭天」
我想伊講兮有道理。東歐蘇聯已經變天，尹嘛
攏無靠銃子。戰車戰袂嬴人民。
祖公仔燒了400 年香有保庇。
電視講南部火山嘛開始塊噴火氣。
我想職兮選舉專家講兮有道理。
咱台灣質擺真正卜出頭天。
選了我有去揣伊。
話ke佇嚨喉哭袂離。
哭甲三更共半冥，
哭甲喙仔開開開。
我即出聲來安慰。
「迄lo老賊著攏已經落台阿，職寡新代表好歹
攏是咱家己選出來兮，咱已經替尹爭取著做主
儂儂兮權利。尹目睭毋peh 予金，咱亦無辦法
。職擺選輸後擺即閣來著是。何必即呢悲傷le
。」
伊chang哭調仔挓來唱。
「無彩咱台灣美麗島。」
「祖先開墾有成果。」
「眾儂來騎無儂疼。」
「狗即食了豬來騎。」
「無疑死豬飼無兩冬著食儂。」
「祖國一時變成空。」
「四百年來hong駛弄。」
「袂記兮家己會使做主儂。」
伊講: 「有儂老父塊破病。」
「弟弟讀冊爻考試，」
「專家無儂通好飼。」
「大姊只好賣身去趁錢。」
「職兮大姊閣真可憐oh!」， 我講。
「暗暗悲傷留目屎。」
「心內痛苦無儂知。」
「等若時機運若來。」
「毋免靠天家己來做安排。」
「是阿! 咱絕對袂使一時落魄來失去奮鬥兮希
望。」
「啊結果le?」
「40年予儂壓落底，」
「妓女已經袂記兮妓女兮悲傷。」
「伊已經變成真正兮趁食查某。」
「袂記兮悲傷著好啊。 這嘛是好代誌啊!」
「敢講一定愛看儂日亦哭冥亦哭。」
「你敢袂感覺職兮趁食查某真可憐?」
「有是有， 嘛毋免哭甲即悲傷。」
「準講是你兮親儂le?」
「你勿亂講，阮即無赫呢衰潲[soesiau]!」
「我是講咱共同兮母親-- 台灣!」
伊chang 都馬調挓來唱。
「咱兮前途咱家己來做主宰。」
「別儂袂凍替咱來做安排。」
「咱兮跤尾若是徛予在。」
「毋驚樹尾塊做風颱。」
「你講咱攏是妓女?」
「是趁食查某!」
「毋知見笑兮趁食查某?」
「咱除了有錢以外，咱自認台灣兮文化卡差著
愛學尹中國文化! 咱自認台語卡差，逐家著學
尹北京語卡高尚。咱自認咱家己無法度做主，
著愛予尹中國統治。箍面桶講繁榮，安定，進
步。台灣儂職擺兮表現毋是已經講甲真清楚。
咱無能力管理咱家己。只有予尹中國儂來統治
。咱即有通好食穿。」
「咱家己自願做奴隸，變成毋知見笑兮趁食查
某，敢講你袂悲傷。」
本來我想卜離開職塊傷心兮土地。佇le我卜走
兮前幾工發生一項代誌。予我決心留兮遮唱歌
予恁聽。
迄一日，阮母仔叫我去買菜，抵著一兮美國囡
仔。我問迄兮美國囡仔後擺大漢卜創啥?
伊講伊卜去一兮田園做捕手。我著問伊去田園
做捕手卜創啥?
伊講伊驚囡仔會跋落去田園邊阿職兮萬丈兮深
坑。
我一時有主意，
著愛緊來去妓女戶。
我卜共尹講尹已經袂記兮身世。
無定，
知影通哭兮妓女閣有。
--
───「清華」大學．「台灣」大學．「建國」中學．「和平」國中───────
海邊丌天頂誠[chia*,很]清爽, 親像一面藍色丌鏡, 幾片白雲佇其中, 職[這]片藍天
連對頭前丌大海, 佇足遠丌所在佮大海接做伙, 接做一條圓圓丌線, 干na[只]看著伊
佇遐[hia,那裡]塊頂動, 分袂出是天益是[iah-si,或是]海。
─── 宋澤萊 《海鼻新娘》
iug@ccms.ntu.edu.tw(Ungian)%iug@ccms.ntu.edu.tw(Ungian)%iug@ccms.ntu.edu.tw
