標 題: 好佳哉晏幾冬出世(TGTST)
發信站: 台灣文化資訊站 (Fri Apr 19 08:10:29 1996)
轉信站: cis_nctu!news.cis.nctu!news.csie.nctu!twserv.csie.nctu!TWserv
好佳哉晏幾冬出世 楊允言
彼工小許發燒，前幾工仔趕空課，生活無啥正常。昨昏歸工就攏
頭昏昏腦鈍鈍，下班時陣淋著雨，轉厝e 了後閣及較早仝款沖冷水，
暗時即發覺情形m 著。平常時身體真勇，一下破病，歸e 人軟 sio-
sio 無元氣。彼工閣著我值班，愛睏toa 研究院內底。
暗時即雄雄想起，到昨昏黃華已經hoo 尹關22年啊。趕緊用印表
機印一張傳單出來，頂高用北京語寫：『你可以不同意他的政治主張
，但是你不應該同意國民黨利用政治手段迫害異己──６月18日黃華
繫獄22週年』。
攏做無空課，歸e 人無精神。朋友去外口店仔租一支錄影帶，招
我鬥陣來看。我想，歇睏一下嘛好。
片名是「血染的季節」，我知影無輕鬆。伊teh 講南非e 種族問
題，1976年發生e 代誌。故事中，一e 白人，伊ti一間學校教歷史，
尹兜倩一e 烏人做園丁，園丁e 後生參加遊行，第一遍hoo 尹掠去拍
成重傷，第二遍掠去了後失蹤，園丁四界探聽，尾仔嘛hoo 尹掠去，
刑求而死，但是特勤組煞講伊是自殺，園丁e 主人（白人）決定beh
替伊拍官司來ka伊平反。
影片中尚精彩e 就是chhe律師、猶有及法庭辯論e 情形。主人要
求律師接這e 案件，律師無愛答應，伊問律師講：你敢m 是拍嬴過足
choe場人權官司？律師講：無較choah ，見若拍嬴，尹就修法。尾仔
律師猶是答應落來。ti法庭上，雖然有真choe真明顯e 理由會當證明
確實是刑求而死，m 過因為法庭嘛是尹e ，根本反袂過。
主人到chit-ma 即來覺醒，原來尹e 國家是按呢。伊決定beh 繼
續走chong ，將這件代誌及所有伊收集來e 證據提供hoo 報社刊出來
。續落來，伊就抵著誠choe麻煩，校長ka伊辭掉，後生嘛無法度閣再
讀書，甚至性命受著威脅。故事e 結局，主人ti將資料提hoo 報社彼
e 暗冥車禍死去（當然是尹弄死e ）。第二工報紙將這e 消息攏刊出
來。
想著這幾工自立晚報teh 刊e 白色檔案，ui影片內面知影南非嘛
有國安法。雄雄想著，尹嘛號做國民黨e 款。哦！莫怪、莫怪……
看了後心情確實袂輕鬆。轉來辦公室，朋友看著我拍e 彼張傳單
，對我講：好佳哉，你若早10冬出世，chit-ma 就m 知會hoo 尹關去
叨位啊！
註：
小許(khoa)：稍微 較(khah)早：從前
軟sio-sio ：軟趴趴 空課(khang-khe )：工作
無較choah ：沒有用 弄(long)死：撞死
莫怪：難怪
No comments:
Post a Comment